apna sar-e-shorida to waqf-e-KHam-e-chaugan hai

apnā sar-e-shorīda to vaqf-e-ḳham-e-chaugān hai

aa bul-havas gar zauq hai ye go hai ye maidān hai

'ālam mirī taqlīd se ḳhvāhish tirī karne lagā

maiñ to pashemāñ ho chukā logoñ ko ab armān hai

har-chand besh-az-besh hai dā'vā to rone kā tujhe

par dīda-e-namnāk bhī ai abr-e-tar tūfān hai

is be-damī meñ bhī kabhū dil bhar uThe hai dam tirā

aa Tuk shitābī bevafā ab tak to mujh meñ jaan hai

har lahza ḳhanjar darmiyāñ har dam zabāñ zer-e-zabāñ

vo taur vo uslūb hai ye ahd ye paimān hai

is ārzū-e-vasl ne mushkil kiyā jiinā mirā

varna guzarnā jaan se itnā nahīñ āsān hai

bas be-vaqārī ho chukī galiyoñ meñ ḳhvārī ho chukī

ab paas kar Tuk 'mīr' kā do-chār din mehmān hai

apna sar-e-shorida to waqf-e-KHam-e-chaugan hai

aa bul-hawas gar zauq hai ye go hai ye maidan hai

'alam meri taqlid se KHwahish teri karne laga

main to pasheman ho chuka logon ko ab arman hai

har-chand besh-az-besh hai da'wa to rone ka tujhe

par dida-e-namnak bhi ai abr-e-tar tufan hai

is be-dami mein bhi kabhu dil bhar uThe hai dam tera

aa Tuk shitabi bewafa ab tak to mujh mein jaan hai

har lahza KHanjar darmiyan har dam zaban zer-e-zaban

wo taur wo uslub hai ye ahd ye paiman hai

is aarzu-e-wasl ne mushkil kiya jina mera

warna guzarna jaan se itna nahin aasan hai

bas be-waqari ho chuki galiyon mein KHwari ho chuki

ab pas kar Tuk 'mir' ka do-chaar din mehman hai