اپنا سر شوریدہ تو وقف خم چوگان ہے

اپنا سر شوریدہ تو وقف خم چوگان ہے

آ بوالہوس گر ذوق ہے یہ گو ہے یہ میدان ہے

عالم مری تقلید سے خواہش تری کرنے لگا

میں تو پشیماں ہو چکا لوگوں کو اب ارمان ہے

ہر چند بیش از بیش ہے دعویٰ تو رونے کا تجھے

پر دیدۂ نمناک بھی اے ابر تر طوفان ہے

اس بے دمی میں بھی کبھو دل بھر اٹھے ہے دم ترا

آ ٹک شتابی بے وفا اب تک تو مجھ میں جان ہے

ہر لحظہ خنجر درمیاں ہر دم زباں زیر زباں

وہ طور وہ اسلوب ہے یہ عہد یہ پیمان ہے

اس آرزوئے وصل نے مشکل کیا جینا مرا

ورنہ گزرنا جان سے اتنا نہیں آسان ہے

بس بے وقاری ہو چکی گلیوں میں خواری ہو چکی

اب پاس کر ٹک میرؔ کا دو چار دن مہمان ہے