apne mue bhi ranj-o-bala hai ham-sayon ki jaanon par

apne muue bhī ranj-o-balā hai ham-sāyoñ kī jānoñ par

kyā kyā sīna-zanī rahtī hai dard-o-ġham ke fasānoñ par

maiñ to kyā kyā harf-o-suḳhan the mere jahāñ se jaate rahe

bāteñ dard-āgīñ haiñ ab tak kaisī kaisī zabānoñ par

tū bhī rabāt-e-kuhan se suufī sair ko chal Tuk sabze kī

abr-e-siyah qible se aa kar jhuum paḌā mai-ḳhānoñ par

āmad-o-raft-e-nasīm se zāhir ranjish-e-bulbul hai lekin

baav bhī ab tak bahī nahīñ gulhā-e-chaman ke kānoñ par

jīġha jīġha us kī sī abrū dilkash niklī na koī yaañ

zor kiye logoñ ne agarche naqsh-o-nigār kamānoñ par

jaan to yaañ hai garm-e-raftan lait-o-la.al vaañ vaisī hai

kyā kyā mujh ko junūñ aatā hai us laḌke ke bahānoñ par

baad mire sub.he ko mere hāthoñ haath malak leñge

sau sau baar liyā hai maiñ ne naam us kā in dānoñ par

dil kī haqīqat arsh kī azmat sab kuchh hai ma.alūm hameñ

sair rahī hai aksar apnī in pākīza makānoñ par

raah chalo tum apnī apnī mere tarīq se kyā tum ko

āñkhoñ se parda maiñ ne kiyā hai vaañ paañv ke nishānoñ par

ishq ajā.ib-zor-āvar hai kushtī sab kī paak huī

zikr-e-'mīr' hai kyā piirī meñ harf-o-suḳhan hai javānoñ par

apne mue bhi ranj-o-bala hai ham-sayon ki jaanon par

kya kya sina-zani rahti hai dard-o-gham ke fasanon par

main to kya kya harf-o-suKHan the mere jahan se jate rahe

baaten dard-agin hain ab tak kaisi kaisi zabanon par

tu bhi rabaat-e-kuhan se sufi sair ko chal Tuk sabze ki

abr-e-siyah qible se aa kar jhum paDa mai-KHanon par

aamad-o-raft-e-nasim se zahir ranjish-e-bulbul hai lekin

baw bhi ab tak bahi nahin gulha-e-chaman ke kanon par

jigha jigha us ki si abru dilkash nikli na koi yan

zor kiye logon ne agarche naqsh-o-nigar kamanon par

jaan to yan hai garm-e-raftan lait-o-lal wan waisi hai

kya kya mujh ko junun aata hai us laDke ke bahanon par

baad mere subhe ko mere hathon hath malak lenge

sau sau bar liya hai main ne nam us ka in danon par

dil ki haqiqat arsh ki azmat sab kuchh hai malum hamein

sair rahi hai aksar apni in pakiza makanon par

rah chalo tum apni apni mere tariq se kya tum ko

aankhon se parda main ne kiya hai wan panw ke nishanon par

ishq ajaib-zor-awar hai kushti sab ki pak hui

zikr-e-'mir' hai kya piri mein harf-o-suKHan hai jawanon par