asar hota hamari gar dua mein

asar hotā hamārī gar duā meñ

lag uThtī aag sab javv-e-samā meñ

na aTkā haa.e Tuk yūsuf kā mālik

vagarna misr sab miltā bahā meñ

qusūr apne hī tūl-e-umr kā thā

na kī taqsīr un ne to jafā meñ

suḳhan-mushtāq haiñ bande ke sab log

sar-o-dil kis ko hai ishq-e-ḳhudā meñ

kafan kyā ishq meñ maiñ ne hī pahnā

khiñche lohū meñ bahuteroñ ke jāmeñ

payām us gul ko is ke haath dete

subuk-pā.ī na hotī gar sabā meñ

jiyo ḳhush yā koī nā-ḳhush hameñ kyā

ham apne mahv haiñ zauq-e-anā meñ

hameñ farhād-o-majnūñ jis se chāho

tum aa kar pūchh lo shahr-e-vafā meñ

sarāpā hī adā-o-nāz hai yaar

qayāmat aatī hai us kī adā meñ

balā zulf-e-siyāh us kī hai pur-pech

vatan dil ne kiyā hai kis balā meñ

za.īf-o-zār tangī se haiñ har-chand

va-lekin 'mīr' uḌte haiñ havā meñ

asar hota hamari gar dua mein

lag uThti aag sab jaww-e-sama mein

na aTka hae Tuk yusuf ka malik

wagarna misr sab milta baha mein

qusur apne hi tul-e-umr ka tha

na ki taqsir un ne to jafa mein

suKHan-mushtaq hain bande ke sab log

sar-o-dil kis ko hai ishq-e-KHuda mein

kafan kya ishq mein main ne hi pahna

khinche lohu mein bahuteron ke jamen

payam us gul ko is ke hath dete

subuk-pai na hoti gar saba mein

jiyo KHush ya koi na-KHush hamein kya

hum apne mahw hain zauq-e-ana mein

hamein farhad-o-majnun jis se chaho

tum aa kar puchh lo shahr-e-wafa mein

sarapa hi ada-o-naz hai yar

qayamat aati hai us ki ada mein

bala zulf-e-siyah us ki hai pur-pech

watan dil ne kiya hai kis bala mein

zaif-o-zar tangi se hain har-chand

wa-lekin 'mir' uDte hain hawa mein