baat kya aadmi ki ban aai

baat kyā aadmī kī ban aa.ī

āsmāñ se zamīn napvā.ī

charḳh-zan is ke vāste hai mudām

ho gayā din tamām raat aa.ī

māh-o-ḳhurshīd-o-abr-o-bād sabhī

is kī ḳhātir hue haiñ saudā.ī

kaise kaise kiye taraddud jab

rang rang is ko chiiz pahuñchā.ī

is ko tarjīh sab ke uupar dī

lutf-e-haq ne kī ‘izzat-afzā.ī

hairat aatī hai is kī bāteñ dekh

ḳhud-sarī ḳhud-sitā.ī ḳhud-rā.ī

shukr ke sajdoñ meñ ye vājib thā

ye bhī kartā sadā jabīñ-sā.ī

so to is kī tabī'at-e-sarkash

sar na laa.ī faro ki Tuk laa.ī

'mīr'-e-nāchīz musht-e-ḳhāk allāh

in ne ye kibriyā kahāñ paa.ī

baat kya aadmi ki ban aai

aasman se zamin napwai

charKH-zan is ke waste hai mudam

ho gaya din tamam raat aai

mah-o-KHurshid-o-abr-o-baad sabhi

is ki KHatir hue hain saudai

kaise kaise kiye taraddud jab

rang rang is ko chiz pahunchai

is ko tarjih sab ke upar di

lutf-e-haq ne ki ‘izzat-afzai

hairat aati hai is ki baaten dekh

KHud-sari KHud-sitai KHud-rai

shukr ke sajdon mein ye wajib tha

ye bhi karta sada jabin-sai

so to is ki tabi'at-e-sarkash

sar na lai faro ki Tuk lai

'mir'-e-nachiz musht-e-KHak allah

in ne ye kibriya kahan pai