bahr-e-firdaus ho aadam ko alam kahe ko

bahr-e-firdaus ho aadam ko alam kaahe ko

vaqf-e-aulād hai vo baaġh to ġham kaahe ko

kahte haiñ āvegā īdhar vo qayāmat-raftār

chalte-phirte raheñge tab ta.iiñ ham kaahe ko

ye bhī ik Dhab hai na iizā na kisū ko rāhat

rahm mauqūf kiyā hai to sitam kaahe ko

nargis un āñkhoñ ko jo likh ga.e nā-bīnā the

apne nazdīk haiñ ve dast-qalam kaahe ko

us kī talvār se gar jaan ko rakhte na aziiz

marte is ḳhvārī se to said-e-haram kaahe ko

chashm-poshī kā mirī jaan tumheñ lapkā hai

khāte ho dīda-darā.ī se qasam kaahe ko

merī āñkhoñ pe rakho paañv jo aao lekin

rakhte ho aisī jagah tum to qadam kaahe ko

dil ko kahte haiñ ki us ganj-e-ravāñ kā ghar hai

is ḳharābe meñ kare hai vo karam kaahe ko

shor ne nām-e-ḳhudā un ke balā sar khīñchā

'mīr' sā hai koī aalam meñ alam kaahe ko

bahr-e-firdaus ho aadam ko alam kahe ko

waqf-e-aulad hai wo bagh to gham kahe ko

kahte hain aawega idhar wo qayamat-raftar

chalte-phirte rahenge tab tain hum kahe ko

ye bhi ek Dhab hai na iza na kisu ko rahat

rahm mauquf kiya hai to sitam kahe ko

nargis un aankhon ko jo likh gae na-bina the

apne nazdik hain we dast-qalam kahe ko

us ki talwar se gar jaan ko rakhte na aziz

marte is KHwari se to said-e-haram kahe ko

chashm-poshi ka meri jaan tumhein lapka hai

khate ho dida-darai se qasam kahe ko

meri aankhon pe rakho panw jo aao lekin

rakhte ho aisi jagah tum to qadam kahe ko

dil ko kahte hain ki us ganj-e-rawan ka ghar hai

is KHarabe mein kare hai wo karam kahe ko

shor ne nam-e-KHuda un ke bala sar khincha

'mir' sa hai koi aalam mein alam kahe ko