barq-o-sharar-o-shola-o-parwana sab hain ye

barq-o-sharār-o-sho'la-o-parvāna sab haiñ ye

juuñ ham jalā kareñ haiñ bhalā jalte kab haiñ ye

le mū-e-sar se nāḳhun-e-pā tak bharī hai aag

jalte haiñ dardmand pe jalte kuDhab haiñ ye

hotā hai dil kā haal 'ajab ġham se us ghaḌī

kahtā hai jab vo tanz se ham ko 'ajab haiñ ye

aatī hai garm bād-e-sabā us kī or se

apne jigar ke jalne ke baare sabab haiñ ye

ġhurbat pe mehrbāñ hue merī so ye kahā

in ko ġharīb koī na samjhe ġhazab haiñ ye

qaaf

farhād-o-qais ke ga.e kahte haiñ ab ye log

rakkhe ḳhudā salāmat inhoñ ko ki ab haiñ ye

sayyad haiñ 'mīr' sāhab-o-darvesh-o-dardmand

sar rakhiye in ke paañv pe jā-e-adab haiñ ye

barq-o-sharar-o-sho'la-o-parwana sab hain ye

jun hum jala karen hain bhala jalte kab hain ye

le mu-e-sar se naKHun-e-pa tak bhari hai aag

jalte hain dardmand pe jalte kuDhab hain ye

hota hai dil ka haal 'ajab gham se us ghaDi

kahta hai jab wo tanz se hum ko 'ajab hain ye

aati hai garm baad-e-saba us ki or se

apne jigar ke jalne ke bare sabab hain ye

ghurbat pe mehrban hue meri so ye kaha

in ko gharib koi na samjhe ghazab hain ye

qaf

farhad-o-qais ke gae kahte hain ab ye log

rakkhe KHuda salamat inhon ko ki ab hain ye

sayyad hain 'mir' sahab-o-darwesh-o-dardmand

sar rakhiye in ke panw pe ja-e-adab hain ye