برق و شرار و شعلہ و پروانہ سب ہیں یے

برق و شرار و شعلہ و پروانہ سب ہیں یے

جوں ہم جلا کریں ہیں بھلا جلتے کب ہیں یے

لے موئے سر سے ناخن پا تک بھری ہے آگ

جلتے ہیں دردمند پہ جلتے کڈھب ہیں یے

ہوتا ہے دل کا حال عجب غم سے اس گھڑی

کہتا ہے جب وہ طنز سے ہم کو عجب ہیں یے

آتی ہے گرم باد صبا اس کی اور سے

اپنے جگر کے جلنے کے بارے سبب ہیں یہ

غربت پہ مہرباں ہوئے میری سو یہ کہا

ان کو غریب کوئی نہ سمجھے غضب ہیں یے

ق

فرہاد و قیس کے گئے کہتے ہیں اب یہ لوگ

رکھے خدا سلامت انھوں کو کہ اب ہیں یے

سید ہیں میرؔ صاحب و درویش و دردمند

سر رکھیے ان کے پاؤں پہ جائے ادب ہیں یے