barson mein kabhu idhar tum naz se aate ho

barsoñ meñ kabhū īdhar tum naaz se aate ho

phir barsoñ ta.iiñ pyāre jī se nahīñ jaate ho

aate ho kabhū yaañ to ham lutf nahīñ paate

sau āfateñ laate ho sau fitne uThāte ho

rahte ho tum āñkhoñ meñ phirte ho tumhīñ dil meñ

muddat se agarche yaañ aate ho na jaate ho

aisī hī zabāñ hai to kyā ohda-barā hoñge

ham ek nahīñ kahte tum laakh sunāte ho

ḳhush karne se Tuk aise nā-ḳhush hī rakhā kariye

hañste ho ghaḌī bhar to pahroñ hī rulāte ho

ik ḳhalq talāshī hai tum haath nahīñ lagte

laḌke to ho par sab ko Taale hī batāte ho

muddat se tumhārā kab īdhar ko tah-e-dil hai

kaahe ko tasanno' se ye bāteñ banāte ho

kuchh ‘izzat-e-kufr āḳhir ai dair ke bāshindo

mujh sahl se ko kyoñ tum zunnār bañdhāte ho

āvāra use phirte phir barsoñ guzarte haiñ

tum jis kisū ko apne Tuk paas biThāte ho

dil khol ke mil chaliye jo 'mīr' se milnā hai

āñkheñ bhī dikhāte ho phir muñh bhī chhupāte ho

barson mein kabhu idhar tum naz se aate ho

phir barson tain pyare ji se nahin jate ho

aate ho kabhu yan to hum lutf nahin pate

sau aafaten late ho sau fitne uThate ho

rahte ho tum aankhon mein phirte ho tumhin dil mein

muddat se agarche yan aate ho na jate ho

aisi hi zaban hai to kya ohda-bara honge

hum ek nahin kahte tum lakh sunate ho

KHush karne se Tuk aise na-KHush hi rakha kariye

hanste ho ghaDi bhar to pahron hi rulate ho

ek KHalq talashi hai tum hath nahin lagte

laDke to ho par sab ko Tale hi batate ho

muddat se tumhaara kab idhar ko tah-e-dil hai

kahe ko tasanno' se ye baaten banate ho

kuchh ‘izzat-e-kufr aaKHir ai dair ke bashindo

mujh sahl se ko kyon tum zunnar bandhate ho

aawara use phirte phir barson guzarte hain

tum jis kisu ko apne Tuk pas biThate ho

dil khol ke mil chaliye jo 'mir' se milna hai

aankhen bhi dikhate ho phir munh bhi chhupate ho