برسوں میں کبھو ایدھر تم ناز سے آتے ہو

برسوں میں کبھو ایدھر تم ناز سے آتے ہو

پھر برسوں تئیں پیارے جی سے نہیں جاتے ہو

آتے ہو کبھو یاں تو ہم لطف نہیں پاتے

سو آفتیں لاتے ہو سو فتنے اٹھاتے ہو

رہتے ہو تم آنکھوں میں پھرتے ہو تمہیں دل میں

مدت سے اگرچہ یاں آتے ہو نہ جاتے ہو

ایسی ہی زباں ہے تو کیا عہدہ برا ہوں گے

ہم ایک نہیں کہتے تم لاکھ سناتے ہو

خوش کرنے سے ٹک ایسے نا خوش ہی رکھا کریے

ہنستے ہو گھڑی بھر تو پہروں ہی رلاتے ہو

اک خلق تلاشی ہے تم ہاتھ نہیں لگتے

لڑکے تو ہو پر سب کو ٹالے ہی بتاتے ہو

مدت سے تمہارا کب ایدھر کو تہ دل ہے

کاہے کو تصنع سے یہ باتیں بناتے ہو

کچھ عزت کفر آخر اے دیر کے باشندو

مجھ سہل سے کو کیوں تم زنار بندھاتے ہو

آوارہ اسے پھرتے پھر برسوں گزرتے ہیں

تم جس کسو کو اپنے ٹک پاس بٹھاتے ہو

دل کھول کے مل چلئے جو میرؔ سے ملنا ہے

آنکھیں بھی دکھاتے ہو پھر منہ بھی چھپاتے ہو