be-lutf-e-yar hum ko kuchh aasra nahin hai

be-lutf-e-yār ham ko kuchh aasrā nahīñ hai

so koī din jo hai to phir sāl-hā nahīñ hai

sun 'ishq jo atibbā karte haiñ chashm-poshī

jāñ-kāh is maraz kī shāyad davā nahīñ hai

jis aañkh se diyā thā un ne fareb dil ko

us aañkh ko jo dekhā ab āshnā nahīñ hai

jab dekho aa.ine ko tab rū-ba-rū hai us ke

be-chashm-o-rū use kuchh sharm-o-hayā nahīñ hai

maiñ barg-band agarche zer-e-shajar rahā huuñ

faqr-e-mukib se lekin barg-o-navā nahīñ hai

shīrīñ-namak-laboñ bin us ke nahīñ halāvat

is talḳh zindagī meñ ab kuchh maza nahīñ hai

aa'zā gudāz ho kar sab bah ga.e haiñ mere

hijrāñ meñ us ke mujh meñ ab kuchh rahā nahīñ hai

sun sānehāt-e-‘ishqī hañs kyoñ na do piyāre

kyā jaano tum kisū se dil Tuk lagā nahīñ hai

dil ḳhuuñ jigar ke TukḌe jab 'mīr' dekhtā huuñ

ab tak zabāñ se apnī maiñ kuchh kahā nahīñ hai

be-lutf-e-yar hum ko kuchh aasra nahin hai

so koi din jo hai to phir sal-ha nahin hai

sun 'ishq jo atibba karte hain chashm-poshi

jaan-kah is maraz ki shayad dawa nahin hai

jis aankh se diya tha un ne fareb dil ko

us aankh ko jo dekha ab aashna nahin hai

jab dekho aaine ko tab ru-ba-ru hai us ke

be-chashm-o-ru use kuchh sharm-o-haya nahin hai

main barg-band agarche zer-e-shajar raha hun

faqr-e-mukib se lekin barg-o-nawa nahin hai

shirin-namak-labon bin us ke nahin halawat

is talKH zindagi mein ab kuchh maza nahin hai

aa'za gudaz ho kar sab bah gae hain mere

hijran mein us ke mujh mein ab kuchh raha nahin hai

sun sanehat-e-‘ishqi hans kyon na do piyare

kya jaano tum kisu se dil Tuk laga nahin hai

dil KHun jigar ke TukDe jab 'mir' dekhta hun

ab tak zaban se apni main kuchh kaha nahin hai