بالقوۃ ٹک دکھائیے چشم پر آب کا

بالقوۃ ٹک دکھائیے چشم پر آب کا

دامن پکڑ کے روئیے یک دم سحاب کا

جو کچھ نظر پڑے ہے حقیقت میں کچھ نہیں

عالم میں خوب دیکھو تو عالم ہے خواب کا

دریا دلی جنہیں ہے نہیں ہوتے کاسہ لیس

دیکھا ہے واژگوں ہی پیالہ حباب کا

شاید کہ قلب یار بھی ٹک اس طرف پھرے

میں منتظر زمانے کے ہوں انقلاب کا

بارے نقاب دن کو جو رکھتا ہے منہ پہ تو

پردہ سا رہ گیا ہے کچھ اک آفتاب کا

تلوار بن نکلتے نہیں گھر سے ایک دم

خوں کر رہو گے تم کسو خانہ خراب کا

یہ ہوش دیکھ آگے مرے ساتھ غیر کے

رکھتا ہے پاؤں مست ہو جیسے شراب کا

مجنوں میں اور مجھ میں کرے کیوں نہ فرق عشق

چھپتا نہیں مزہ تو جلے سے کباب کا

رو فرصت جوانی پہ جوں ابر بے خبر

انداز برق کا سا ہے عہد شباب کا

واں سے تو نامہ بر کو ہے کب کا جواب صاف

میں سادگی سے لاگو ہوں خط کے جواب کا

ٹپکا کرے ہے زہر ہی صرف اس نگاہ سے

وہ چشم گھر ہے غصہ و ناز و عتاب کا

لائق تھا ریجھنے ہی کے مصراع قد یار

میں معتقد ہوں میرؔ ترے انتخاب کا