burqe ko uTha chehre se wo but agar aawe

burqe ko uThā chehre se vo but agar aave

allāh kī qudrat kā tamāshā nazar aave

ai nāqa-e-lailā do qadam raah ġhalat kar

majnūn-e-za-ḳhud-rafta kabhū raah par aave

Tuk baad mire mere taraf-dāroñ kane tū

koī bhejiyo zālim ki tasallī to kar aave

kyā zarf hai gardūn-e-tunak-hausla kā jo

āshob-e-fuġhāñ ke mire ohde se bar aave

mumkin nahīñ ārām de betābi jigar kī

jab tak na palak par koī TukḌā nazar aave

mat mumtahin-e-bāġh ho ai ġhairat-e-gulzār

gul kyā ki jise aage tire baat kar aave

khulne meñ tire muñh ke kalī phāḌe garebāñ

hilne meñ tire hoñToñ ke gul-barg tar aave

ham aap se jaate rahe haiñ zauq-e-ḳhabar meñ

ai jān-ba-lab-āmada rah tā ḳhabar aave

kahte haiñ tire kūche se 'mīr' aane kahe hai

jab jāniye vo ḳhāna-ḳharāb apne ghar aave

hai jī meñ ġhazal-dar-ġhazal ai tab.a ye kahiye

shāyad ki nazīrī ke bhī ohde se bar aave

burqe ko uTha chehre se wo but agar aawe

allah ki qudrat ka tamasha nazar aawe

ai naqa-e-laila do qadam rah ghalat kar

majnun-e-za-KHud-rafta kabhu rah par aawe

Tuk baad mere mere taraf-daron kane tu

koi bhejiyo zalim ki tasalli to kar aawe

kya zarf hai gardun-e-tunak-hausla ka jo

aashob-e-fughan ke mere ohde se bar aawe

mumkin nahin aaram de betabi jigar ki

jab tak na palak par koi TukDa nazar aawe

mat mumtahin-e-bagh ho ai ghairat-e-gulzar

gul kya ki jise aage tere baat kar aawe

khulne mein tere munh ke kali phaDe gareban

hilne mein tere honTon ke gul-barg tar aawe

hum aap se jate rahe hain zauq-e-KHabar mein

ai jaan-ba-lab-amada rah ta KHabar aawe

kahte hain tere kuche se 'mir' aane kahe hai

jab jaaniye wo KHana-KHarab apne ghar aawe

hai ji mein ghazal-dar-ghazal ai taba ye kahiye

shayad ki naziri ke bhi ohde se bar aawe