برقعے کو اٹھا چہرے سے وہ بت اگر آوے

برقعے کو اٹھا چہرے سے وہ بت اگر آوے

اللہ کی قدرت کا تماشا نظر آوے

اے ناقۂ لیلیٰ دو قدم راہ غلط کر

مجنون زخود رفتہ کبھو راہ پر آوے

ٹک بعد مرے میرے طرف داروں کنے تو

کوئی بھیجیو ظالم کہ تسلی تو کر آوے

کیا ظرف ہے گردون تنک حوصلہ کا جو

آشوب فغاں کے مرے عہدے سے بر آوے

ممکن نہیں آرام دے بیتابی جگر کی

جب تک نہ پلک پر کوئی ٹکڑا نظر آوے

مت ممتحن باغ ہو اے غیرت گلزار

گل کیا کہ جسے آگے ترے بات کر آوے

کھلنے میں ترے منہ کے کلی پھاڑے گریباں

ہلنے میں ترے ہونٹوں کے گل برگ تر آوے

ہم آپ سے جاتے رہے ہیں ذوق خبر میں

اے جان بہ لب آمدہ رہ تا خبر آوے

کہتے ہیں ترے کوچے سے میرؔ آنے کہے ہے

جب جانیے وہ خانہ خراب اپنے گھر آوے

ہے جی میں غزل در غزل اے طبع یہ کہیے

شاید کہ نظیری کے بھی عہدے سے بر آوے