chalo chaman mein jo dil khule Tuk baham gham-e-dil kaha karenge

chalo chaman meñ jo dil khule Tuk baham ġham-e-dil kahā kareñge

tuyūr hī se bakā kareñge guloñ ke aage bukā kareñge

qarār dil se kiyā hai ab ke ki ruk ke ghar meñ na mariyegā yuuñ

bahār aa.ī jo apne jiite to sair karne chalā kareñge

halāk honā muqarrarī hai maraz se dil ke pa tum kuḌho ho

mizāj sāhib agar udhar hai to ham bhī apnī davā kareñge

burā hai dil kā hamāre lagnā lagānā ġhusse se āshiqī ke

nuchī jabīñ se galī meñ us kī ḳharāb-o-ḳhasta phirā kareñge

visāl-e-ḳhūbāñ na kar tamanna ki zahr shīrīñ-labī hai un kī

ḳharāb-o-rusvā judā kareñge halāk mil kar judā kareñge

agar vo rashk-e-bahār samjhe ki rang apnā bhī hai ab aisā

varaq ḳhizāñ meñ jo zard hoñge ġham-e-dil un par likhā kareñge

ġham-e-mohabbat meñ 'mīr' ham ko hamesha jalnā hamesha marnā

sa.ūbat aisī dimāġh-e-rafta kahāñ talak ab vafā kareñge

chalo chaman mein jo dil khule Tuk baham gham-e-dil kaha karenge

tuyur hi se baka karenge gulon ke aage buka karenge

qarar dil se kiya hai ab ke ki ruk ke ghar mein na mariyega yun

bahaar aai jo apne jite to sair karne chala karenge

halak hona muqarrari hai maraz se dil ke pa tum kuDho ho

mizaj sahib agar udhar hai to hum bhi apni dawa karenge

bura hai dil ka hamare lagna lagana ghusse se aashiqi ke

nuchi jabin se gali mein us ki KHarab-o-KHasta phira karenge

visal-e-KHuban na kar tamanna ki zahr shirin-labi hai un ki

KHarab-o-ruswa juda karenge halak mil kar juda karenge

agar wo rashk-e-bahaar samjhe ki rang apna bhi hai ab aisa

waraq KHizan mein jo zard honge gham-e-dil un par likha karenge

gham-e-mohabbat mein 'mir' hum ko hamesha jalna hamesha marna

saubat aisi dimagh-e-rafta kahan talak ab wafa karenge