chamakna barq ka karta hai kar-e-tegh hijran mein

chamaknā barq kā kartā hai kār-e-teġh hijrāñ meñ

barasnā miiñh kā dāḳhil hai us bin tīr-e-bārāñ meñ

bhare rahte haiñ saare phuul hī jis ke garebāñ meñ

vo kyā jaane ki TukḌe haiñ jigar ke mere dāmāñ meñ

kahīñ shām-o-sahar royā thā majnūñ ishq-e-lailā meñ

hanūz āshob donoñ vaqt rahtā hai bayābāñ meñ

ḳhayāl-e-yār meñ aage hai yak mah-pāra yaañ har dam

agar hijrāñ meñ zindānī huuñ par huuñ yūsufistāñ meñ

rakhā arsa junūñ par tang mushtāqoñ kī duurī se

kise maarā hai us ghatiye ne sanmukh ho ke maidāñ meñ

jahāñ se dekhiye ik sher-e-shor-añgez nikle hai

qayāmat kā sā hangāma hai har jā mere dīvāñ meñ

jo dekho to nahīñ ye haal apnā husn se ḳhālī

damak almās kī sī hai hamārī chashm-e-hairāñ meñ

ḳharābī aa ga.ī dīnoñ meñ millat ga.ī use dekhe

mile se us ke raḳhne paḌ ga.e logoñ ke īmāñ meñ

nikal aatā hai ghar se har ghaḌī nange badan bāhar

burā ye aa paḌā hai aib us āsā.ish-e-jāñ meñ

sitam ke tiir us ke mere siine meñ bahut TuuTe

kiyā jaatā hai mushkil farq ab dil aur paikāñ meñ

havā-e-abr meñ kyā 'mīr' hañstā baaġh meñ vo thā

girī paḌtī hai bijlī aaj kuchh sehn-e-gulistāñ meñ

chamakna barq ka karta hai kar-e-tegh hijran mein

barasna minh ka daKHil hai us bin tir-e-baran mein

bhare rahte hain sare phul hi jis ke gareban mein

wo kya jaane ki TukDe hain jigar ke mere daman mein

kahin sham-o-sahar roya tha majnun ishq-e-laila mein

hanuz aashob donon waqt rahta hai bayaban mein

KHayal-e-yar mein aage hai yak mah-para yan har dam

agar hijran mein zindani hun par hun yusufistan mein

rakha arsa junun par tang mushtaqon ki duri se

kise mara hai us ghatiye ne sanmukh ho ke maidan mein

jahan se dekhiye ek sher-e-shor-angez nikle hai

qayamat ka sa hangama hai har ja mere diwan mein

jo dekho to nahin ye haal apna husn se KHali

damak almas ki si hai hamari chashm-e-hairan mein

KHarabi aa gai dinon mein millat gai use dekhe

mile se us ke raKHne paD gae logon ke iman mein

nikal aata hai ghar se har ghaDi nange badan bahar

bura ye aa paDa hai aib us aasaish-e-jaan mein

sitam ke tir us ke mere sine mein bahut TuTe

kiya jata hai mushkil farq ab dil aur paikan mein

hawa-e-abr mein kya 'mir' hansta bagh mein wo tha

giri paDti hai bijli aaj kuchh sehn-e-gulistan mein