چمن یار تیرا ہوا خواہ ہے

چمن یار تیرا ہوا خواہ ہے

گل اک دل ہے جس میں تری چاہ ہے

سراپا میں اس کے نظر کر کے تم

جہاں دیکھو اللہ اللہ ہے

تری آہ کس سے خبر پائیے

وہی بے خبر ہے جو آگاہ ہے

مرے لب پہ رکھ کان آواز سن

کہ اب تک بھی یک ناتواں آہ ہے

گزر سر سے تب عشق کی راہ چل

کہ ہر گام یاں اک خطر گاہ ہے

کبھو وادیٔ عشق دکھلائیے

بہت خضر بھی دل میں گمراہ ہے

جہاں سے تو رخت اقامت کو باندھ

یہ منزل نہیں بے خبر راہ ہے

نہ شرمندہ کر اپنے منہ سے مجھے

کہا میں نے کب یہ کہ تو ماہ ہے

یہ وہ کارواں گاہ دل کش ہے میرؔ

کہ پھر یاں سے حسرت ہی ہم راہ ہے