charKH par apna madar dekhiye kab tak rahe

charḳh par apnā madār dekhiye kab tak rahe

aisī tarah rozgār dekhiye kab tak rahe

sehre kahāñ tak paḌeñ āñsuoñ ke chehre par

girya gale hī kā haar dekhiye kab tak rahe

zo'f se āñkheñ muñdīñ khul na ga.iiñ phir shitāb

ġhash ye hameñ ab kī baar dekhiye kab tak rahe

lab pe mire aan kar bārhā phir phir ga.ī

jaan ko ye iztirār dekhiye kab tak rahe

us se to ahd-o-qarār kuchh bhī nahīñ darmiyāñ

dil hai mirā be-qarār dekhiye kab tak rahe

is sire se us sire daaġh hī haiñ sadr meñ

in bhī guloñ kī bahār dekhiye kab tak rahe

āñkheñ to pathrā ga.iiñ takte hue us kī raah

shām-o-sahar intizār dekhiye kab tak rahe

aañkh milātā nahīñ in dinoñ vo shoḳh Tuk

be-maza hai ham se yaar dekhiye kab tak rahe

rū-e-suḳhan sab kā hai merī ġhazal kī taraf

she’r hī merā shi'ār dekhiye kab tak rahe

gesū-o-ruḳhsār-e-yār āñkhoñ hī meñ phirte haiñ

'mīr' ye lail-o-nahār dekhiye kab tak rahe

charKH par apna madar dekhiye kab tak rahe

aisi tarah rozgar dekhiye kab tak rahe

sehre kahan tak paDen aansuon ke chehre par

girya gale hi ka haar dekhiye kab tak rahe

zo'f se aankhen mundin khul na gain phir shitab

ghash ye hamein ab ki bar dekhiye kab tak rahe

lab pe mere aan kar barha phir phir gai

jaan ko ye iztirar dekhiye kab tak rahe

us se to ahd-o-qarar kuchh bhi nahin darmiyan

dil hai mera be-qarar dekhiye kab tak rahe

is sire se us sire dagh hi hain sadr mein

in bhi gulon ki bahaar dekhiye kab tak rahe

aankhen to pathra gain takte hue us ki rah

sham-o-sahar intizar dekhiye kab tak rahe

aankh milata nahin in dinon wo shoKH Tuk

be-maza hai hum se yar dekhiye kab tak rahe

ru-e-suKHan sab ka hai meri ghazal ki taraf

she’r hi mera shi'ar dekhiye kab tak rahe

gesu-o-ruKHsar-e-yar aankhon hi mein phirte hain

'mir' ye lail-o-nahaar dekhiye kab tak rahe