dekh usko hanste sab ke dam se gae ukhaD kar

dekh us ko hañste sab ke dam se ga.e ukhaḌ kar

Thahre hai aarsī bhī dāñtoñ zamīñ pakaḌ kar

kyā kyā niyāz-tīnat ai nāz-pesha tujh bin

marte haiñ ḳhāk-e-rah se goḌe ragaḌ ragaḌ kar

qad-kash chaman ke apnī ḳhūbī ko nyo chale haiñ

paayā phal us se āḳhir kyā sarv ne akaḌ kar

vo sar chaḌhā hai itnā apnī firotanī se

khoyā hamīñ ne us ko har lahza paañv paḌ kar

pā-e-sabāt bhī hai nām-āvarī ko lāzim

mash.hūr hai nagīñ jo baiThā hai ghar meñ gaḌ kar

duurī meñ dilbaroñ kī kaTtī hai kyūñke sab kī

aadhā nahīñ rahā huuñ tujh se to maiñ bichhaḌ kar

ab kaisā zohd-o-taqvā daarū hai aur ham haiñ

bint-ul-inab ke apnā sab kuchh gayā ghusaḌ kar

dekho na chashm-e-kam se mā'mūra-e-jahāñ ko

bantā hai ek ghar yaañ sau sūrateñ bigaḌ kar

us pusht-e-lab ke uupar daane araq ke yuuñ haiñ

yāqūt se rakhe haiñ juuñ motiyoñ ko jaḌ kar

nā-sāzgārī apne tāle.a kī kyā kaheñ ham

aayā kabhū na yaañ Tuk ġhairoñ se yaar laḌ kar

apne mizāj meñ bhī hai 'mīr' zid nihāyat

phir mar hī ke uTheñge baiTheñge ham jo aḌ kar

dekh us ko hanste sab ke dam se gae ukhaD kar

Thahre hai aarsi bhi danton zamin pakaD kar

kya kya niyaz-tinat ai naz-pesha tujh bin

marte hain KHak-e-rah se goDe ragaD ragaD kar

qad-kash chaman ke apni KHubi ko nyo chale hain

paya phal us se aaKHir kya sarw ne akaD kar

wo sar chaDha hai itna apni firotani se

khoya hamin ne us ko har lahza panw paD kar

pa-e-sabaat bhi hai nam-awari ko lazim

mashhur hai nagin jo baiTha hai ghar mein gaD kar

duri mein dilbaron ki kaTti hai kyunke sab ki

aadha nahin raha hun tujh se to main bichhaD kar

ab kaisa zohd-o-taqwa daru hai aur hum hain

bint-ul-inab ke apna sab kuchh gaya ghusaD kar

dekho na chashm-e-kam se ma'mura-e-jahan ko

banta hai ek ghar yan sau suraten bigaD kar

us pusht-e-lab ke upar dane araq ke yun hain

yaqut se rakhe hain jun motiyon ko jaD kar

na-sazgari apne talea ki kya kahen hum

aaya kabhu na yan Tuk ghairon se yar laD kar

apne mizaj mein bhi hai 'mir' zid nihayat

phir mar hi ke uThenge baiThenge hum jo aD kar