der kuchh khinchti to kahte bhi mulaqat ki baat

der kuchh khiñchtī to kahte bhī mulāqāt kī baat

milnā apnā jo huā us se so vo baat kī baat

guftugū shāhid-o-mai se hai na ġhībat na gila

ḳhānqah kī sī nahīñ baat ḳharābāt kī baat

sun ke āvāz-e-sag-e-yār hue ham ḳhāmosh

bolte vaañ haiñ jahāñ hove musāvāt kī baat

muñh idhar aur suḳhan zer-e-labī ġhair ke saath

us farebanda kī nāguftanī hai ghaat kī baat

is liye shaiḳh hai chupkā ki paḌe shahr meñ shor

ham samajhte haiñ ye shayyādī-o-tāmāt kī baat

ye kis āshufta kī jam’iyyat-e-dil thī manzūr

baal bikhre tire muñh par kaheñ haiñ raat kī baat

guftugū vasfoñ se us maah ke kariye ai 'mīr'

kāhish-afzā hai karūñ us kī agar zaat kī baat

der kuchh khinchti to kahte bhi mulaqat ki baat

milna apna jo hua us se so wo baat ki baat

guftugu shahid-o-mai se hai na ghibat na gila

KHanqah ki si nahin baat KHarabaat ki baat

sun ke aawaz-e-sag-e-yar hue hum KHamosh

bolte wan hain jahan howe musawat ki baat

munh idhar aur suKHan zer-e-labi ghair ke sath

us farebanda ki naguftani hai ghat ki baat

is liye shaiKH hai chupka ki paDe shahr mein shor

hum samajhte hain ye shayyaadi-o-tamat ki baat

ye kis aashufta ki jam’iyyat-e-dil thi manzur

baal bikhre tere munh par kahen hain raat ki baat

guftugu wasfon se us mah ke kariye ai 'mir'

kahish-afza hai karun us ki agar zat ki baat