dil jalte kuchh ban nahin aati haal bigaDte jate hain

dil jalte kuchh ban nahīñ aatī haal bigaḌte jaate haiñ

jaise charāġh-e-āḳhirī shab ham log nabaḌte jaate haiñ

rang-e-sabāt chaman kā uḌāyā bād-e-tund-e-ḳhizāñ ne sab

barg-o-bār o nauras gul ke ġhunche jhaḌte jaate haiñ

tīnat meñ hai niyāz jinhoñ kī masjūd un kī sab hai zamīñ

ḳhaak jo ye pāmāl hai is se sar ko ragaḌte jaate haiñ

raah ajab pesh aa.ī ham ko yaañ se tanhā jaane kī

yār-o-hamdam hamrāhī har-gām bichhaḌte jaate haiñ

zo'f-e-dimāġh se uftāñ ḳhezāñ chalte haiñ ham rāh-e-havas

dekheñ kyā pesh aave ab to girte paḌte jaate haiñ

qad ko apne hashr-ḳhirām ke ek nahīñ lag saktā hai

sarv-e-ravān-e-bāġh-e-jahāñ har chand akaḌte jaate haiñ

'mīr' balā nā-sāz tabī.at laḌke haiñ ḳhush-zāhir bhī

saath hamāre raah meñ haiñ phir ham se laḌte jaate haiñ

dil jalte kuchh ban nahin aati haal bigaDte jate hain

jaise charagh-e-aKHiri shab hum log nabaDte jate hain

rang-e-sabaat chaman ka uDaya baad-e-tund-e-KHizan ne sab

barg-o-bar o nauras gul ke ghunche jhaDte jate hain

tinat mein hai niyaz jinhon ki masjud un ki sab hai zamin

KHak jo ye pamal hai is se sar ko ragaDte jate hain

rah ajab pesh aai hum ko yan se tanha jaane ki

yar-o-hamdam hamrahi har-gam bichhaDte jate hain

zo'f-e-dimagh se uftan KHezan chalte hain hum rah-e-hawas

dekhen kya pesh aawe ab to girte paDte jate hain

qad ko apne hashr-KHiram ke ek nahin lag sakta hai

sarw-e-rawan-e-bagh-e-jahan har chand akaDte jate hain

'mir' bala na-saz tabiat laDke hain KHush-zahir bhi

sath hamare rah mein hain phir hum se laDte jate hain