دل جلتے کچھ بن نہیں آتی حال بگڑتے جاتے ہیں

دل جلتے کچھ بن نہیں آتی حال بگڑتے جاتے ہیں

جیسے چراغ آخری شب ہم لوگ نبڑتے جاتے ہیں

رنگ ثبات چمن کا اڑایا باد تند خزاں نے سب

برگ و بار و نورس گل کے غنچے جھڑتے جاتے ہیں

طینت میں ہے نیاز جنہوں کی مسجود ان کی سب ہے زمیں

خاک جو یہ پامال ہے اس سے سر کو رگڑتے جاتے ہیں

راہ عجب پیش آئی ہم کو یاں سے تنہا جانے کی

یار و ہمدم ہم راہی ہر گام بچھڑتے جاتے ہیں

ضعف دماغ سے افتاں خیزاں چلتے ہیں ہم راہ ہوس

دیکھیں کیا پیش آوے اب تو گرتے پڑتے جاتے ہیں

قد کو اپنے حشر خرام کے ایک نہیں لگ سکتا ہے

سرو روان باغ جہاں ہر چند اکڑتے جاتے ہیں

میرؔ بلا ناساز طبیعت لڑکے ہیں خوش ظاہر بھی

ساتھ ہمارے راہ میں ہیں پھر ہم سے لڑتے جاتے ہیں