dil kho gaya hun main yahin diwana-pan ke bich

dil kho gayā huuñ maiñ yahīñ dīvāna-pan ke biich

tum bhī to dekho zulf-e-shikan-dar-shikan ke biich

kyā jaane dil meñ chaav the kyā kyā dam-e-visāl

mahjūr us kā thā hama-hasrat kafan ke biich

kan.āñ se jā ke misr meñ yūsuf huā aziiz

izzat kisū kī hotī nahīñ hai vatan ke biich

sun ai junūñ ki mujh meñ nahīñ kuchh sivā-e-dam

taar ek rah gayā hai yahī pairahan ke biich

sarsabz hind hī meñ nahīñ kuchh ye reḳhta

hai dhuum mere sher kī saare dakan ke biich

suthrā.ī aur nāzukī gul-barg kī durust

par vaisī bū kahāñ ki jo hai us badan ke biich

qaaf

bulbul ḳhamosh-o-lāla-o-gul donoñ surḳh-o-zard

shamshād mahv-e-be-kalī ik nastaran ke biich

kal ham bhī sair-e-bāġh meñ the saath yaar ke

dekhā to aur rang hai saare chaman ke biich

qaaf

yā saath ġhair ke hai tumheñ vaisī bāt-chīt

sau sau tarah ke lutf haiñ ik ik suḳhan ke biich

yā paas mere lagtī hai chup aisī aan kar

goyā zabāñ nahīñ hai tumhārī dahan ke biich

farhād-o-qais-o-'mīr' ye āvārgān-e-ishq

yūñhī ga.e haiñ sab kī rahī man kī man ke biich

dil kho gaya hun main yahin diwana-pan ke bich

tum bhi to dekho zulf-e-shikan-dar-shikan ke bich

kya jaane dil mein chaw the kya kya dam-e-visal

mahjur us ka tha hama-hasrat kafan ke bich

kanan se ja ke misr mein yusuf hua aziz

izzat kisu ki hoti nahin hai watan ke bich

sun ai junun ki mujh mein nahin kuchh siwa-e-dam

tar ek rah gaya hai yahi pairahan ke bich

sarsabz hind hi mein nahin kuchh ye reKHta

hai dhum mere sher ki sare dakan ke bich

suthrai aur nazuki gul-barg ki durust

par waisi bu kahan ki jo hai us badan ke bich

qaf

bulbul KHamosh-o-lala-o-gul donon surKH-o-zard

shamshad mahw-e-be-kali ek nastaran ke bich

kal hum bhi sair-e-bagh mein the sath yar ke

dekha to aur rang hai sare chaman ke bich

qaf

ya sath ghair ke hai tumhein waisi baat-chit

sau sau tarah ke lutf hain ek ek suKHan ke bich

ya pas mere lagti hai chup aisi aan kar

goya zaban nahin hai tumhaari dahan ke bich

farhad-o-qais-o-'mir' ye aawargan-e-ishq

yunhi gae hain sab ki rahi man ki man ke bich