دل کھو گیا ہوں میں یہیں دیوانہ پن کے بیچ

دل کھو گیا ہوں میں یہیں دیوانہ پن کے بیچ

تم بھی تو دیکھو زلف شکن در شکن کے بیچ

کیا جانے دل میں چاؤ تھے کیا کیا دم وصال

مہجور اس کا تھا ہمہ حسرت کفن کے بیچ

کنعاں سے جا کے مصر میں یوسف ہوا عزیز

عزت کسو کی ہوتی نہیں ہے وطن کے بیچ

سن اے جنوں کہ مجھ میں نہیں کچھ سوائے دم

تار ایک رہ گیا ہے یہی پیرہن کے بیچ

سرسبز ہند ہی میں نہیں کچھ یہ ریختہ

ہے دھوم میرے شعر کی سارے دکن کے بیچ

ستھرائی اور نازکی گلبرگ کی درست

پر ویسی بو کہاں کہ جو ہے اس بدن کے بیچ

ق

بلبل خموش و لالہ و گل دونوں سرخ و زرد

شمشاد محو بے کلی اک نسترن کے بیچ

کل ہم بھی سیر باغ میں تھے ساتھ یار کے

دیکھا تو اور رنگ ہے سارے چمن کے بیچ

ق

یا ساتھ غیر کے ہے تمہیں ویسی بات چیت

سو سو طرح کے لطف ہیں اک اک سخن کے بیچ

یا پاس میرے لگتی ہے چپ ایسی آن کر

گویا زباں نہیں ہے تمہاری دہن کے بیچ

فرہاد و قیس و میرؔ یہ آوارگان عشق

یوں ہی گئے ہیں سب کی رہی من کی من کے بیچ