dil KHun hua hamara TukDe hue jigar ke

dil ḳhuuñ huā hamārā TukḌe hue jigar ke

dekhā na tum ne īdhar sarfe se ik nazar ke

chashme kahīñ haiñ joshāñ juueñ kahīñ haiñ jaarī

āsār ab talak haiñ yāroñ kī chashm-e-tar ke

rahne kī apne jā to nai dair hai na ka.aba

uThiye jo us ke dar se to hojiye kidhar ke

is sher-o-shā.erī par achchhī bañdhī na ham se

mahv-e-ḳhayāl shā.ir yuuñ hī haiñ us kamar ke

duniyā meñ hai baserā yaaro sarā.e kā sā

ye rahravān-e-hastī aazim haiñ sab safar ke

ve ye hī chhātiyāñ haiñ zaḳhmoñ se jo bharī haiñ

kyā hai jo bul-havas ne do-chār khaa.e charke

tah be-ḳhudī kī apnī kyā kuchh vare dharī hai

ham be-ḳhabar hue haiñ pahuñche kisū ḳhabar ke

us āstāñ kī duurī is dil kī nā-subūrī

kyā kahiye aah ġham se ghar ke hue na dar ke

ḳhaak aisī āshiqī meñ Thukrā.e bhī ga.e kal

paañv kane se us ke par 'mīr' jī na sarke

dil KHun hua hamara TukDe hue jigar ke

dekha na tum ne idhar sarfe se ek nazar ke

chashme kahin hain joshan juen kahin hain jari

aasar ab talak hain yaron ki chashm-e-tar ke

rahne ki apne ja to nai dair hai na kaba

uThiye jo us ke dar se to hojiye kidhar ke

is sher-o-shaeri par achchhi bandhi na hum se

mahw-e-KHayal shair yun hi hain us kamar ke

duniya mein hai basera yaro sarae ka sa

ye rahrawan-e-hasti aazim hain sab safar ke

we ye hi chhatiyan hain zaKHmon se jo bhari hain

kya hai jo bul-hawas ne do-chaar khae charke

tah be-KHudi ki apni kya kuchh ware dhari hai

hum be-KHabar hue hain pahunche kisu KHabar ke

us aastan ki duri is dil ki na-suburi

kya kahiye aah gham se ghar ke hue na dar ke

KHak aisi aashiqi mein Thukrae bhi gae kal

panw kane se us ke par 'mir' ji na sarke