dil ki kuchh taqsir nahin hai aankhen us se lag paDiyan

dil kī kuchh taqsīr nahīñ hai āñkheñ us se lag paḌiyāñ

maar rakhā so un ne mujh ko kis zālim se jā laḌiyāñ

ek nigah meñ mar jaatā hai āshiq-e-kūchak-dil us kā

zahr bharī kyā kaam aatī haiñ go ve āñkheñ hoñ baḌiyāñ

uqde dāġh-e-dil ke shāyad Dast-e-qudrat kholegā

nāḳhun se tadbīr ke merī khultī nahīñ ye gul-jhaḌiyāñ

nahs the kyā ve vaqt o saa.at jin meñ lagā thā dil apnā

saal pahar hai ab to ham ko maah barābar haiñ ghaḌiyāñ

'mīr' balā-e-jān rahe haiñ donoñ firāq-o-vasl us ke

hijr kī rāteñ vo bhārī thiiñ milne ke din kī ye kaḌiyāñ

dil ki kuchh taqsir nahin hai aankhen us se lag paDiyan

mar rakha so un ne mujh ko kis zalim se ja laDiyan

ek nigah mein mar jata hai aashiq-e-kuchak-dil us ka

zahr bhari kya kaam aati hain go we aankhen hon baDiyan

uqde dagh-e-dil ke shayad Dast-e-qudrat kholega

naKHun se tadbir ke meri khulti nahin ye gul-jhaDiyan

nahs the kya we waqt o saat jin mein laga tha dil apna

sal pahar hai ab to hum ko mah barabar hain ghaDiyan

'mir' bala-e-jaan rahe hain donon firaq-o-wasl us ke

hijr ki raaten wo bhaari thin milne ke din ki ye kaDiyan