dil ki tah ki kahi nahin jati kahiye to ji maren hain

dil kī tah kī kahī nahīñ jaatī kahiye to jī māreñ haiñ

ruk kar phuuT bahīñ jo āñkheñ ruud kī sī do dhāreñ haiñ

harf-shanās na the jab tum to be-pursish thā bosa-e-lab

ek ik baat kī mushtāqoñ se sau sau ab takrāreñ haiñ

'ishq ke dīvāne kī salāsil hiltī hai to Dareñ haiñ ham

bigḌe pīl-e-mast kī sī zanjīroñ kī jhankāreñ haiñ

ve bhauveñ jīdhar hoñ ḳhamīda ūdhar kā hai ḳhudā-hāfiz

yā'nī jauhar-dār jhukī ḳhūñ-rez kī do talvāreñ haiñ

ve ve jin logoñ ko phirte āñkhoñ ham ne dekhā thā

hadd-e-nazar tak aaj unhoñ kī gird-e-shahr mazāreñ haiñ

pech-o-tāb meñ bal khā khā kar koī mare yaañ un ko kyā

vaañ ve liye mashshāta ko yaksū baal hī apne sañvāreñ haiñ

baḌe baḌe the ghar jin ke yaañ āsār un ke haiñ ye ab

'mīr' shikasta darvāze haiñ girī paḌī dīvāreñ haiñ

dil ki tah ki kahi nahin jati kahiye to ji maren hain

ruk kar phuT bahin jo aankhen rud ki si do dhaaren hain

harf-shanas na the jab tum to be-pursish tha bosa-e-lab

ek ek baat ki mushtaqon se sau sau ab takraren hain

'ishq ke diwane ki salasil hilti hai to Daren hain hum

bigDe pil-e-mast ki si zanjiron ki jhankaren hain

we bhauwen jidhar hon KHamida udhar ka hai KHuda-hafiz

ya'ni jauhar-dar jhuki KHun-rez ki do talwaren hain

we we jin logon ko phirte aankhon hum ne dekha tha

hadd-e-nazar tak aaj unhon ki gird-e-shahr mazaren hain

pech-o-tab mein bal kha kha kar koi mare yan un ko kya

wan we liye mashshata ko yaksu baal hi apne sanwaren hain

baDe baDe the ghar jin ke yan aasar un ke hain ye ab

'mir' shikasta darwaze hain giri paDi diwaren hain