dil ko gul kahte the dard-o-gham se murjhaya gaya

dil ko gul kahte the dard-o-ġham se murjhāyā gayā

jī ko mehmāñ sunte the mehmān sā aaya gayā

ishq se ho haal jī meñ kuchh to kahiye dekhiyo

ek din bāteñ hī karte karte sannāyā gayā

justujū meñ ye ta.ab khīñche ki āḳhir ho ga.e

ham to kho.e bhī ga.e lekin na tū paayā gayā

ik nigah karne meñ ġhārat kar diyā ai vaa.e ham

dil jo saarī umr kā apnā thā sarmāya gayā

kyā ta.ajjub hai jo koī dil-zada nāgah mire

iztirāb-e-ishq meñ jī tan se ghabrāyā gayā

maah kahte to kahā us rū-e-ḳhush kā hai harīf

shahr meñ phir ham se apnā muñh na dikhlāyā gayā

jaise parchhā.īñ dikhā.ī de ke ho jaatī hai mahv

'mīr' bhī us kām-e-jāñ kā vūhīñ thā saaya gayā

dil ko gul kahte the dard-o-gham se murjhaya gaya

ji ko mehman sunte the mehman sa aaya gaya

ishq se ho haal ji mein kuchh to kahiye dekhiyo

ek din baaten hi karte karte sannaya gaya

justuju mein ye tab khinche ki aaKHir ho gae

hum to khoe bhi gae lekin na tu paya gaya

ek nigah karne mein ghaarat kar diya ai wae hum

dil jo sari umr ka apna tha sarmaya gaya

kya tajjub hai jo koi dil-zada nagah mere

iztirab-e-ishq mein ji tan se ghabraya gaya

mah kahte to kaha us ru-e-KHush ka hai harif

shahr mein phir hum se apna munh na dikhlaya gaya

jaise parchhain dikhai de ke ho jati hai mahw

'mir' bhi us kaam-e-jaan ka wuhin tha saya gaya