dil mera muztarib nihayat hai

dil mirā muztarib nihāyat hai

ranj-o-hirmāñ kī ye badāyat hai

muñh idhar kar kabhū na vo soyā

kyā duā shab kī be-sarāyat hai

ab vo mah aur ek mah se milā

chand-dar-chand ye hikāyat hai

har taraf bahs tujh se hai ai ishq

shukr terā tirī shikāyat hai

aise ranj-o-'anā meñ ūdhar se

pursish-e-hāl bhī ināyat hai

dahr kā ho gila ki shikva-e-charḳh

us sitamgar hī se kināyat hai

mat murā.āt-e-ġhair rakh manzūr

mere haq meñ yahī ri.āyat hai

āshiq ab baḌh ga.e hameñ chhāñTo

is meñ sarkār kī kifāyat hai

kab mile 'mīr' mulk-dāroñ se

vo gadā-e-shah-e-vilāyat hai

dil mera muztarib nihayat hai

ranj-o-hirman ki ye badayat hai

munh idhar kar kabhu na wo soya

kya dua shab ki be-sarayat hai

ab wo mah aur ek mah se mila

chand-dar-chand ye hikayat hai

har taraf bahs tujh se hai ai ishq

shukr tera teri shikayat hai

aise ranj-o-'ana mein udhar se

pursish-e-haal bhi inayat hai

dahr ka ho gila ki shikwa-e-charKH

us sitamgar hi se kinayat hai

mat muraat-e-ghair rakh manzur

mere haq mein yahi riayat hai

aashiq ab baDh gae hamein chhanTo

is mein sarkar ki kifayat hai

kab mile 'mir' mulk-daron se

wo gada-e-shah-e-wilayat hai