dost rakhta hun bahut apne dil-e-bimar ko

dost rakhtā huuñ bahut apne dil-e-bīmār ko

ḳhuuñ kiyā hai muddatoñ is meñ ġham-e-bisyār ko

juz azīz-az-jāñ nahīñ yūsuf ko likhtā ye kabhū

kyā ġhurūr-e-mīrzā.ī hai hamāre yaar ko

jab kabhū īdhar se nikle hai to ik hasrat ke saath

dekhe hai ḳhurshīd us ke sāya-e-dīvār ko

bojh to achchhā thā par āḳhir girau rakhte hue

vajh-e-jām-e-mai na paayā ḳhirqa-o-dastār ko

ḳhūñ-chakāñ shikve haiñ dil se tā-zabāñ merī vale

sī liyā hai tū kahe maiñ ne lab-e-iz.hār ko

tasfiye se dil meñ mere muñh nazar aatā hai lek

kyā karūñ ā.īna-sāñ meñ hasrat-e-dīdār ko

āshiqī vo rog hai jis meñ ki ho jaatī hai yaas

achchhe hote kam sunā hai 'mīr' is āzār ko

dost rakhta hun bahut apne dil-e-bimar ko

KHun kiya hai muddaton is mein gham-e-bisyar ko

juz aziz-az-jaan nahin yusuf ko likhta ye kabhu

kya ghurur-e-mirzai hai hamare yar ko

jab kabhu idhar se nikle hai to ek hasrat ke sath

dekhe hai KHurshid us ke saya-e-diwar ko

bojh to achchha tha par aaKHir girau rakhte hue

wajh-e-jam-e-mai na paya KHirqa-o-dastar ko

KHun-chakan shikwe hain dil se ta-zaban meri wale

si liya hai tu kahe main ne lab-e-izhaar ko

tasfiye se dil mein mere munh nazar aata hai lek

kya karun aaina-san mein hasrat-e-didar ko

aashiqi wo rog hai jis mein ki ho jati hai yas

achchhe hote kam suna hai 'mir' is aazar ko