dosti ne to hamari jaan-gudazi KHub ki

dostī ne to hamārī jāñ-gudāzī ḳhuub kī

aah us dushman ne ye āshiq-navāzī ḳhuub kī

gor par aaya samand-e-nāz ko jaulāñ kiye

us sipāhī-zāde ne kyā turk-tāzī ḳhuub kī

āshiqoñ kī ḳhastagī bad-halī kī parvā nahīñ

ai sarāpā naaz tū ne be-niyāzī ḳhuub kī

tang cholī ne to maarā tang-darzī se hameñ

ḳhaak bhī barbād kī dāman-darāzī ḳhuub kī

saan maarā aur kushtoñ meñ mire kushte ko bhī

us kushinde laḌke ne be-imtiyāzī ḳhuub kī

chhoḌ kar māmūra-e-duniyā ko jangal jā base

ham jahān-e-āb-o-gil meñ ḳhāna-sāzī ḳhuub kī

khel laḌkoñ kā samajh kar chaah ko āḳhir ga.e

'mīr' piirī meñ to tum ne ishq-bāzī ḳhuub kī

dosti ne to hamari jaan-gudazi KHub ki

aah us dushman ne ye aashiq-nawazi KHub ki

gor par aaya samand-e-naz ko jaulan kiye

us sipahi-zade ne kya turk-tazi KHub ki

aashiqon ki KHastagi bad-hali ki parwa nahin

ai sarapa naz tu ne be-niyazi KHub ki

tang choli ne to mara tang-darzi se hamein

KHak bhi barbaad ki daman-daraazi KHub ki

san mara aur kushton mein mere kushte ko bhi

us kushinde laDke ne be-imtiyazi KHub ki

chhoD kar mamura-e-duniya ko jangal ja base

hum jahan-e-ab-o-gil mein KHana-sazi KHub ki

khel laDkon ka samajh kar chah ko aaKHir gae

'mir' piri mein to tum ne ishq-bazi KHub ki