دشمنوں کے روبرو دشنام ہے

دشمنوں کے روبرو دشنام ہے

یہ بھی کوئی لطف بے ہنگام ہے

محو زلف یار ہے عالم تمام

حسن کا بھی شہرا جوش شام ہے

عشق کی ہے راہ کیا مشکل گزر

سر کا جانا جس میں ہر اک گام ہے

گر کہا ناکام ملنے کو کبھی

تو یہ کہتا ہے کہ مجھ کو کام ہے

روز و شب پھرتا ہوں اس کوچے کے گرد

کیا کہوں کیا گردش ایام ہے

چین دن کو ہے نہ شب کو خواب ٹک

اس کی دوری میں کسے آرام ہے

بزم میں پوچھا تو یوں انجان ہو

میرؔ ان لوگوں میں کس کا نام ہے