faeda misr mein yusuf rahe zindan ke bich

fā.eda misr meñ yūsuf rahe zindān ke biich

bhej de kyoñ na zuleḳhā use kan.ān ke biich

tū na thā murdan-e-dushvār meñ āshiq ke aah

hasrateñ kitnī girah thiiñ ramaq ik jaan ke biich

chashm-e-bad-dūr ki kuchh rang hai ab girya par

ḳhuun jhamke hai paḌā dīda-e-giryāñ ke biich

haal gulzār-e-zamāna kā hai jaise ki shafaq

rang kuchh aur hī ho jaa.e hai ik aan ke biich

taak kī chhāñv meñ juuñ mast paḌe sote hoñ

aiñDtī haiñ nigaheñ sāya-e-mizhgān ke biich

jī liyā bosa-e-ruḳhsār-e-muḳhattat de kar

āqibat un ne hameñ zahr diyā paan ke biich

da.avā-e-ḳhush-dahanī us se isī muñh par gul

sar to Tuk Daal ke dekh apne garebān ke biich

kurte malmal ke pahan aate to ho rindoñ meñ

shaiḳh sāhab na kahīñ jufte paḌeñ shaan ke biich

kaan rakh rakh ke bahut dard-e-dil-e-'mīr' ko tum

sunte to ho pa kahīñ dard na ho kaan ke biich

faeda misr mein yusuf rahe zindan ke bich

bhej de kyon na zuleKHa use kanan ke bich

tu na tha murdan-e-dushwar mein aashiq ke aah

hasraten kitni girah thin ramaq ek jaan ke bich

chashm-e-bad-dur ki kuchh rang hai ab girya par

KHun jhamke hai paDa dida-e-giryan ke bich

haal gulzar-e-zamana ka hai jaise ki shafaq

rang kuchh aur hi ho jae hai ek aan ke bich

tak ki chhanw mein jun mast paDe sote hon

ainDti hain nigahen saya-e-mizhgan ke bich

ji liya bosa-e-ruKHsar-e-muKHattat de kar

aaqibat un ne hamein zahr diya pan ke bich

dawa-e-KHush-dahani us se isi munh par gul

sar to Tuk Dal ke dekh apne gareban ke bich

kurte malmal ke pahan aate to ho rindon mein

shaiKH sahab na kahin jufte paDen shan ke bich

kan rakh rakh ke bahut dard-e-dil-e-'mir' ko tum

sunte to ho pa kahin dard na ho kan ke bich