firaq aankh lagne ki ja hi nahin

firāq aañkh lagne kī jā hī nahīñ

palak se palak āshnā hī nahīñ

gila ishq kā badv-e-ḳhalqat se hai

ġham-e-dil ko kuchh intihā hī nahīñ

mohabbat jahāñ kī tahāñ ho chukī

kuchh is rog kī bhī davā hī nahīñ

dikhāyā kiye yaar us ruḳh kā satah

kahīñ aarsī ko hayā hī nahīñ

vo kyā kuchh nahīñ husn ke shahr meñ

nahīñ hai to rasm-e-vafā hī nahīñ

chaman mahv us rū-e-ḳhush kā hai sab

gul-e-tar kī ab vo havā hī nahīñ

nahīñ dair agar 'mīr' ka.aba to hai

hamāre koī kyā ḳhudā hī nahīñ

firaq aankh lagne ki ja hi nahin

palak se palak aashna hi nahin

gila ishq ka badw-e-KHalqat se hai

gham-e-dil ko kuchh intiha hi nahin

mohabbat jahan ki tahan ho chuki

kuchh is rog ki bhi dawa hi nahin

dikhaya kiye yar us ruKH ka satah

kahin aarsi ko haya hi nahin

wo kya kuchh nahin husn ke shahr mein

nahin hai to rasm-e-wafa hi nahin

chaman mahw us ru-e-KHush ka hai sab

gul-e-tar ki ab wo hawa hi nahin

nahin dair agar 'mir' kaba to hai

hamare koi kya KHuda hi nahin