ghair ko dekhe hai garmi se na kuchh lag lage

ġhair ko dekhe hai garmī se na kuchh laag lage

is liye dekh rahā hai ki mujhe aag lage

aañkh har ek kī dauḌe hai kafak par tere

paañv se lag ke tire mehñdī ko kuchh bhaag lage

ho na dīvāna jo us gauhar-e-ḳhush-āb kā to

lab-e-dariyā ke ta.iiñ kyoñ raheñ yuuñ jhaag lage

ab to un gesuoñ kī yaad meñ maiñ mahv huā

go qayāmat ko mire muñh se hoñ do naag lage

laḌke dillī ke tire haath meñ kab aa.e 'mīr'

pīchhe ek ek ke sau sau phireñ haiñ Daag lage

ghair ko dekhe hai garmi se na kuchh lag lage

is liye dekh raha hai ki mujhe aag lage

aankh har ek ki dauDe hai kafak par tere

panw se lag ke tere mehndi ko kuchh bhag lage

ho na diwana jo us gauhar-e-KHush-ab ka to

lab-e-dariya ke tain kyon rahen yun jhag lage

ab to un gesuon ki yaad mein main mahw hua

go qayamat ko mere munh se hon do nag lage

laDke dilli ke tere hath mein kab aae 'mir'

pichhe ek ek ke sau sau phiren hain Dag lage