ghair se ab yar hua chahiye

ġhair se ab yaar huā chāhiye

multajī nā-chār huā chāhiye

jis ke ta.iiñ DhūñDūñ huuñ vo sab meñ hai

kis kā talabgār huā chāhiye

taaki vo Tuk aan ke pūchhe kabhū

is liye bīmār huā chāhiye

zulf kisū kī ho ki ho ḳhāl-o-ḳhat

dil ko giraftār huā chāhiye

teġh buland us kī huī bul-havas

marne ko tayyār huā chāhiye

mistabā-e-be-ḳhudī hai ye jahāñ

jald ḳhabar-dār huā chāhiye

mol hai bāzār kā hastī ke ye

dil ke ḳharīdār huā chāhiye

kuchh nahīñ ḳhurshīd-sifat sar-kashī

sāya-e-dīvār huā chāhiye

kar na ta.alluq ki ye manzil nahīñ

aah subuk-bār huā chāhiye

go safarī ab nahīñ zāhir meñ 'mīr'

āqibat-e-kār huā chāhiye

ghair se ab yar hua chahiye

multaji na-chaar hua chahiye

jis ke tain DhunDun hun wo sab mein hai

kis ka talabgar hua chahiye

taki wo Tuk aan ke puchhe kabhu

is liye bimar hua chahiye

zulf kisu ki ho ki ho KHal-o-KHat

dil ko giraftar hua chahiye

tegh buland us ki hui bul-hawas

marne ko tayyar hua chahiye

mistaba-e-be-KHudi hai ye jahan

jald KHabar-dar hua chahiye

mol hai bazar ka hasti ke ye

dil ke KHaridar hua chahiye

kuchh nahin KHurshid-sifat sar-kashi

saya-e-diwar hua chahiye

kar na talluq ki ye manzil nahin

aah subuk-bar hua chahiye

go safari ab nahin zahir mein 'mir'

aaqibat-e-kar hua chahiye