ghairon se we ishaare humse chhupa chhupa kar

ġhairoñ se ve ishāre ham se chhupā chhupā kar

phir dekhnā udhar ko āñkheñ milā milā kar

har gaam sadd-e-rah thī but-ḳhāne kī mohabbat

ka.abe talak to pahuñche lekin ḳhudā ḳhudā kar

naḳhchīr-gah meñ tujh se jo nīm-kushta chhūTā

hasrat ne us ko āḳhir maarā liTā liTā kar

ik lutf kī nigah bhī ham ne na chāhī us se

rakkhā hameñ to un ne āñkheñ dikhā dikhā kar

nāseh mire junūñ se aagah na thā ki nāhaq

gūdaḌ kiyā garebāñ saarā silā silā kar

ik rang-e-pāñ hī us kā dil-ḳhūñ-kun-e-jahāñ hai

phabtā hai us ko karnā bāteñ chabā chabā kar

juuñ sham-e-sub.h-gāhī yak-bār bujh ga.e ham

us sho.ala-ḳhū ne ham ko maarā jalā jalā kar

us harf-e-nāshinau se sohbat bigaḌ hī jā hai

har-chand laate haiñ ham bāteñ banā banā kar

maiñ manā 'mīr' tujh ko kartā na thā hamesha

khoī na jaan tū ne dil ko lagā lagā kar

ghairon se we ishaare hum se chhupa chhupa kar

phir dekhna udhar ko aankhen mila mila kar

har gam sadd-e-rah thi but-KHane ki mohabbat

kabe talak to pahunche lekin KHuda KHuda kar

naKHchir-gah mein tujh se jo nim-kushta chhuTa

hasrat ne us ko aaKHir mara liTa liTa kar

ek lutf ki nigah bhi hum ne na chahi us se

rakkha hamein to un ne aankhen dikha dikha kar

naseh mere junun se aagah na tha ki nahaq

gudaD kiya gareban sara sila sila kar

ek rang-e-pan hi us ka dil-KHun-kun-e-jahan hai

phabta hai us ko karna baaten chaba chaba kar

jun sham-e-subh-gahi yak-bar bujh gae hum

us shoala-KHu ne hum ko mara jala jala kar

us harf-e-nashinau se sohbat bigaD hi ja hai

har-chand late hain hum baaten bana bana kar

main mana 'mir' tujh ko karta na tha hamesha

khoi na jaan tu ne dil ko laga laga kar