gar baadiye mein tujhko saba le ke jae shauq

gar bādiye meñ tujh ko sabā le ke jaa.e shauq

majnūñ ko merī or se kahiyo duā-e-shauq

vasl-o-judā.ī se hai mubarrā vo kām-e-jāñ

ma.alūm kuchh huā na hameñ yaañ sivā-e-shauq

har chaar or uḌtī phire hai hamārī ḳhaak

sar se ga.ī na jī bhī ga.e par havā-e-shauq

dair-o-haram meñ ham ko phirātā hai der tak

phir bhī hamāre saath vahī hai adā-e-shauq

afsos aise kūche se tum āshnā nahīñ

kyā dardnāk nai bhī koī hai navā-e-shauq

dard aur āh-o-nāla kare hai dam-e-sahar

yak-musht par hai murġh-e-gulistāñ pe haa.e shauq

kyā pūchhte ho shauq kahāñ tak hai ham ko 'mīr'

marnā hī ahl-e-dard kā hai intihā-e-shauq

gar baadiye mein tujh ko saba le ke jae shauq

majnun ko meri or se kahiyo dua-e-shauq

wasl-o-judai se hai mubarra wo kaam-e-jaan

malum kuchh hua na hamein yan siwa-e-shauq

har chaar or uDti phire hai hamari KHak

sar se gai na ji bhi gae par hawa-e-shauq

dair-o-haram mein hum ko phiraata hai der tak

phir bhi hamare sath wahi hai ada-e-shauq

afsos aise kuche se tum aashna nahin

kya dardnak nai bhi koi hai nawa-e-shauq

dard aur aah-o-nala kare hai dam-e-sahar

yak-musht par hai murgh-e-gulistan pe hae shauq

kya puchhte ho shauq kahan tak hai hum ko 'mir'

marna hi ahl-e-dard ka hai intiha-e-shauq