gar rozgar hai yahi hijran-e-yar mein

gar rozgār hai yahī hijrān-e-yār meñ

to kyā raheñge jiite ham is rozgār meñ

kuchh Dar nahīñ jo dāġh-e-junūñ ho ga.e siyāh

Dar dil ke iztirāb kā hai is bahār meñ

kyā be-qarār dil kī tasallī kare koī

kuchh bhī sabāt hai tire ahd-o-qarār meñ

betāb dil na dafn ho ai kaash mere saath

rahne na degā laash koī din mazār meñ

vo sang-dil na aaya bahut dekhī us kī raah

pathrā chalī haiñ āñkheñ mirī intizār meñ

thamtā nahīñ hai ronā 'alal-ittisāl kā

kyā iḳhtiyār girya-e-be-iḳhtiyār meñ

marbūt kaise kaise kahe reḳhte vale

samjhā na koī merī zabāñ is dayār meñ

thī bazm-e-sher raat ko shā.ir bahut the jam.a

do bāteñ ham ne aise na kiiñ chaar chaar meñ

dumbāla-gardī qais ne bahuterī kī vale

aaya nazar na mahmil-e-lailā ġhubār meñ

ab zauq-e-said us ko nahīñ varna pesh-azīñ

ūdham thā vahsh-o-tair se us ke shikār meñ

qaaf

muñh chāhiye jo koī kisū se hisāb le

nā-kas se guftugū nahīñ roz-e-shumār meñ

gintī ke logoñ kī vahāñ saf hovegī khaḌī

tū 'mīr' kis shumār meñ hai kis qatār meñ

gar rozgar hai yahi hijran-e-yar mein

to kya rahenge jite hum is rozgar mein

kuchh Dar nahin jo dagh-e-junun ho gae siyah

Dar dil ke iztirab ka hai is bahaar mein

kya be-qarar dil ki tasalli kare koi

kuchh bhi sabaat hai tere ahd-o-qarar mein

betab dil na dafn ho ai kash mere sath

rahne na dega lash koi din mazar mein

wo sang-dil na aaya bahut dekhi us ki rah

pathra chali hain aankhen meri intizar mein

thamta nahin hai rona 'alal-ittisal ka

kya iKHtiyar girya-e-be-iKHtiyar mein

marbut kaise kaise kahe reKHte wale

samjha na koi meri zaban is dayar mein

thi bazm-e-sher raat ko shair bahut the jama

do baaten hum ne aise na kin chaar chaar mein

dumbaala-gardi qais ne bahuteri ki wale

aaya nazar na mahmil-e-laila ghubar mein

ab zauq-e-said us ko nahin warna pesh-azin

udham tha wahsh-o-tair se us ke shikar mein

qaf

munh chahiye jo koi kisu se hisab le

na-kas se guftugu nahin roz-e-shumar mein

ginti ke logon ki wahan saf howegi khaDi

tu 'mir' kis shumar mein hai kis qatar mein