garmi se aashiqi ki aaKHir ko ho raha kuchh

garmī se āshiqī kī āḳhir ko ho rahā kuchh

paanī huā hai kuchh to merā jigar jalā kuchh

āzurda-dil hazāroñ marte hī ham sune haiñ

bīmārī-e-dilī kī shāyad nahīñ davā kuchh

vārafta hai gulistāñ us rū-e-champa.ī kā

hai fasl-e-gul pe gul kā ab vo nahīñ maza kuchh

vo aarsī ke aage pahroñ hai be-takalluf

muñh se hamāre us ko aatī nahīñ hayā kuchh

dil hī ke ġham meñ guzre das din jo umr ke the

achraj hai is nagar se jaatā nahīñ dahā kuchh

muñh kar bhī merī jānib sotā nahīñ kabhū vo

kyā jānūñ us ke jī meñ hai is taraf se kyā kuchh

dil le faqīr kā bhī hāthoñ meñ dil-dahī kar

aa jaa.e hai jahāñ meñ aage liyā diyā kuchh

yāroñ kī āh-o-zārī hove qubūl kyūñkar

un kī zabāñ meñ kuchh hai dil meñ hai kuchh duā kuchh

saarī vahī haqīqat malhūz sab meñ rakhiye

kahiye numūd hove jo us ke mā-sivā kuchh

harf-o-suḳhan kī us se apnī majāl kyā hai

un ne kahā hai kyā kyā maiñ ne agar kahā kuchh

kab tak ye bad-sharābī piirī to 'mīr' aa.ī

jaane ke ho muhayyā ab kar chalo bhalā kuchh

garmi se aashiqi ki aaKHir ko ho raha kuchh

pani hua hai kuchh to mera jigar jala kuchh

aazurda-dil hazaron marte hi hum sune hain

bimari-e-dili ki shayad nahin dawa kuchh

warafta hai gulistan us ru-e-champai ka

hai fasl-e-gul pe gul ka ab wo nahin maza kuchh

wo aarsi ke aage pahron hai be-takalluf

munh se hamare us ko aati nahin haya kuchh

dil hi ke gham mein guzre das din jo umr ke the

achraj hai is nagar se jata nahin daha kuchh

munh kar bhi meri jaanib sota nahin kabhu wo

kya jaanun us ke ji mein hai is taraf se kya kuchh

dil le faqir ka bhi hathon mein dil-dahi kar

aa jae hai jahan mein aage liya diya kuchh

yaron ki aah-o-zari howe qubul kyunkar

un ki zaban mein kuchh hai dil mein hai kuchh dua kuchh

sari wahi haqiqat malhuz sab mein rakhiye

kahiye numud howe jo us ke ma-siwa kuchh

harf-o-suKHan ki us se apni majal kya hai

un ne kaha hai kya kya main ne agar kaha kuchh

kab tak ye bad-sharabi piri to 'mir' aai

jaane ke ho muhayya ab kar chalo bhala kuchh