گرمی سے عاشقی کی آخر کو ہو رہا کچھ

گرمی سے عاشقی کی آخر کو ہو رہا کچھ

پانی ہوا ہے کچھ تو میرا جگر جلا کچھ

آزردہ دل ہزاروں مرتے ہی ہم سنے ہیں

بیماریٔ دلی کی شاید نہیں دوا کچھ

وارفتہ ہے گلستاں اس روئے چمپئی کا

ہے فصل گل پہ گل کا اب وہ نہیں مزہ کچھ

وہ آرسی کے آگے پہروں ہے بے تکلف

منہ سے ہمارے اس کو آتی نہیں حیا کچھ

دل ہی کے غم میں گزرے دس دن جو عمر کے تھے

اچرج ہے اس نگر سے جاتا نہیں دہا کچھ

منہ کر بھی میری جانب سوتا نہیں کبھو وہ

کیا جانوں اس کے جی میں ہے اس طرف سے کیا کچھ

دل لے فقیر کا بھی ہاتھوں میں دل دہی کر

آ جائے ہے جہاں میں آگے لیا دیا کچھ

یاروں کی آہ و زاری ہووے قبول کیوں کر

ان کی زباں میں کچھ ہے دل میں ہے کچھ دعا کچھ

ساری وہی حقیقت ملحوظ سب میں رکھیے

کہیے نمود ہووے جو اس کے ماسوا کچھ

حرف و سخن کی اس سے اپنی مجال کیا ہے

ان نے کہا ہے کیا کیا میں نے اگر کہا کچھ

کب تک یہ بد شرابی پیری تو میرؔ آئی

جانے کے ہو مہیا اب کر چلو بھلا کچھ