go jaan kar tujhe sab tabir kar rahe hain

go jaan kar tujhe sab ta.abīr kar rahe haiñ

ham log tere uupar sau jī se mar rahe haiñ

khiñchtā chalā hai ab to tasdīq ko tasavvur

har lahza us ke jalve pesh-e-nazar rahe haiñ

nikle havas jo ab bhī ho vaar hī qafas se

shā.ista-e-parīdan do-chār par rahe haiñ

kal dekhte hamāre baste the ghar barābar

ab ye kahīñ kahīñ jo dīvār-o-dar rahe haiñ

kyā aaj DabDabā.ī dekho ho tum ye āñkheñ

juuñ chashma yūñhī barsoñ ham chashm-e-tar rahe haiñ

nai ġham hai ham ko yaañ kā nai fikr kuchh hai vaañ kā

sadqe junūñ ke kyā ham be-dard-e-sar rahe haiñ

paas ek din bhī apnā un ne nahīñ kiyā hai

ham duur us se be-dam do-do pahar rahe haiñ

kyā ye sarā-e-fānī hai jā-e-bāsh apnī

ham yaañ musāfirāna aakar utar rahe haiñ

aisā na ho ki chheḌe yakbār phuuT bahiye

ham pakke phoḌe ke ab mānind bhar rahe haiñ

is mai-kade meñ jis jā hushiyār chāhiye the

rahmat hai ham ko ham bhī kyā be-ḳhabar rahe haiñ

go rāh-e-ishq meñ ho shamshīr ke dam uupar

vasvās kyā hai ham to jī se guzar rahe haiñ

chal ham-nashīñ bane to ek aadh bait suniye

kahte haiñ baad muddat 'mīr' apne ghar rahe haiñ

go jaan kar tujhe sab tabir kar rahe hain

hum log tere upar sau ji se mar rahe hain

khinchta chala hai ab to tasdiq ko tasawwur

har lahza us ke jalwe pesh-e-nazar rahe hain

nikle hawas jo ab bhi ho war hi qafas se

shaista-e-paridan do-chaar par rahe hain

kal dekhte hamare baste the ghar barabar

ab ye kahin kahin jo diwar-o-dar rahe hain

kya aaj DabDabai dekho ho tum ye aankhen

jun chashma yunhi barson hum chashm-e-tar rahe hain

nai gham hai hum ko yan ka nai fikr kuchh hai wan ka

sadqe junun ke kya hum be-dard-e-sar rahe hain

pas ek din bhi apna un ne nahin kiya hai

hum dur us se be-dam do-do pahar rahe hain

kya ye sara-e-fani hai ja-e-bash apni

hum yan musafirana aakar utar rahe hain

aisa na ho ki chheDe yakbar phuT bahiye

hum pakke phoDe ke ab manind bhar rahe hain

is mai-kade mein jis ja hushiyar chahiye the

rahmat hai hum ko hum bhi kya be-KHabar rahe hain

go rah-e-ishq mein ho shamshir ke dam upar

waswas kya hai hum to ji se guzar rahe hain

chal ham-nashin bane to ek aadh bait suniye

kahte hain baad muddat 'mir' apne ghar rahe hain