go ki but-KHane ja raha hun main

go ki but-ḳhāne jā rahā huuñ maiñ

ba-ḳhudā bā-ḳhudā rahā huuñ maiñ

sab ga.e dil-dimāġh tāb-o-tavāñ

maiñ rahā huuñ so kyā rahā huuñ maiñ

barq to maiñ na thā ki jal bujhtā

abr-e-tar huuñ ki chhā rahā huuñ maiñ

us kī begāna-vaza.ī hai ma.alūm

barsoñ tak āshnā rahā huuñ maiñ

dekho kab teġh us kī aa baiThe

der se sar uThā rahā huuñ maiñ

us kī gard-e-samand kā mushtāq

āñkheñ har-sū lagā rahā huuñ maiñ

duur ke log jin ne maare qarīb

us ke hamsā.e aa rahā huuñ maiñ

mujh ko bad-hāl rahne deñ ai kaash

be-davā kuchh bhulā rahā huuñ maiñ

dil-jaloñ ko ḳhudā jahāñ meñ rakhe

yā shaqā.iq hai yā rahā huuñ maiñ

kuchh rahā hī nahīñ hai mujh meñ 'mīr'

jab se un se judā rahā huuñ maiñ

go ki but-KHane ja raha hun main

ba-KHuda ba-KHuda raha hun main

sab gae dil-dimagh tab-o-tawan

main raha hun so kya raha hun main

barq to main na tha ki jal bujhta

abr-e-tar hun ki chha raha hun main

us ki begana-wazai hai malum

barson tak aashna raha hun main

dekho kab tegh us ki aa baiThe

der se sar uTha raha hun main

us ki gard-e-samand ka mushtaq

aankhen har-su laga raha hun main

dur ke log jin ne mare qarib

us ke hamsae aa raha hun main

mujh ko bad-haal rahne den ai kash

be-dawa kuchh bhula raha hun main

dil-jalon ko KHuda jahan mein rakhe

ya shaqaiq hai ya raha hun main

kuchh raha hi nahin hai mujh mein 'mir'

jab se un se juda raha hun main