gul-gasht ki hawas thi so-to ba-gir aae

gul-gasht kī havas thī so-to ba-gīr aa.e

aa.e jo ham chaman meñ ho kar asiir aa.e

fursat meñ yak-nafas kī kyā dard-e-dil sunoge

aa.e to tum va-lekin vaqt-e-aḳhīr aa.e

dillī meñ ab ke aa kar un yāroñ ko na dekhā

kuchh ve ga.e shitābī kuchh ham bhī der aa.e

kyā ḳhūbī is chaman kī mauqūf hai kisū par

gul gar ga.e adam ko mukhḌe nazīr aa.e

shikva nahīñ jo us ko parvā na ho hamārī

darvāze jis ke ham se kitne faqīr aa.e

umr-e-darāz kyūñkar muḳhtār-e-ḳhizr hai yaañ

ek-ādh din meñ ham to jiine se sair aa.e

nazdīk thī qafas meñ parvāz-e-rūh apnī

ġhunche ho gulbunoñ par jab ham-safīr aa.e

yuuñ baiThe baiThe nāgah gardan lage hilāne

sar shaiḳh jī ke goyā majlis meñ piir aa.e

qāmat ḳhamīda apnī jaise kamāñ thī lekin

qurbāñ-gah-e-vafā meñ mānind-e-tīr aa.e

bin jī diye nahīñ hai imkān yaañ se jaanā

bismil-gah-e-jahāñ meñ ab ham to 'mīr' aa.e

gul-gasht ki hawas thi so-to ba-gir aae

aae jo hum chaman mein ho kar asir aae

fursat mein yak-nafas ki kya dard-e-dil sunoge

aae to tum wa-lekin waqt-e-aKHir aae

dilli mein ab ke aa kar un yaron ko na dekha

kuchh we gae shitabi kuchh hum bhi der aae

kya KHubi is chaman ki mauquf hai kisu par

gul gar gae adam ko mukhDe nazir aae

shikwa nahin jo us ko parwa na ho hamari

darwaze jis ke hum se kitne faqir aae

umr-e-daraaz kyunkar muKHtar-e-KHizr hai yan

ek-adh din mein hum to jine se sair aae

nazdik thi qafas mein parwaz-e-ruh apni

ghunche ho gulbunon par jab ham-safir aae

yun baiThe baiThe nagah gardan lage hilane

sar shaiKH ji ke goya majlis mein pir aae

qamat KHamida apni jaise kaman thi lekin

qurban-gah-e-wafa mein manind-e-tir aae

bin ji diye nahin hai imkan yan se jaana

bismil-gah-e-jahan mein ab hum to 'mir' aae