hai jumbish-e-lab mushkil jab aan ke wah baiThe

hai jumbish-e-lab mushkil jab aan ke vah baiThe

jo chāheñ so yuuñ kah leñ log apnī jagah baiThe

jī Duub ga.e apne andoh ke dariyā meñ

ve josh kahāñ ab ham muddat huī vah baiThe

kyā rang meñ shoḳhī hai us ke tan-e-nāzuk kī

pairāhan agar pahne to us pe bhī tah baiThe

sar gul ne uThāyā thā is baaġh meñ so dekhā

kyā naaz se yaañ koī kaj kar ke kulah baiThe

marte hue par chāhat zāhir na kī agloñ ne

be-hausla the ham jo is raaz ko kah baiThe

kyā jaane ki īdhar kā kab qasd karegā vo

pāmāl hue ham to us se sar-e-rah baiThe

jo haath chaḌhā us ke dil ḳhuuñ hī kiyā us kā

us panja-e-rañgīñ kī ai 'mīr' na gah baiThe

hai jumbish-e-lab mushkil jab aan ke wah baiThe

jo chahen so yun kah len log apni jagah baiThe

ji Dub gae apne andoh ke dariya mein

we josh kahan ab hum muddat hui wah baiThe

kya rang mein shoKHi hai us ke tan-e-nazuk ki

pairahan agar pahne to us pe bhi tah baiThe

sar gul ne uThaya tha is bagh mein so dekha

kya naz se yan koi kaj kar ke kulah baiThe

marte hue par chahat zahir na ki aglon ne

be-hausla the hum jo is raaz ko kah baiThe

kya jaane ki idhar ka kab qasd karega wo

pamal hue hum to us se sar-e-rah baiThe

jo hath chaDha us ke dil KHun hi kiya us ka

us panja-e-rangin ki ai 'mir' na gah baiThe