hum ishq mein na jaana gham hi sada rahega

ham ishq meñ na jaanā ġham hī sadā rahegā

das din jo hai ye mohlat so yaañ dahā rahegā

burqā uThe pe us ke hogā jahān raushan

ḳhurshīd kā nikalnā kyūñkar chhupā rahegā

ik vahm sī rahī hai apnī numūd tan meñ

aate ho ab to aao phir ham meñ kyā rahegā

mazkūr-e-yār ham se mat ham-nashīñ kiyā kar

dil jo bajā nahīñ hai phir us meñ jā rahegā

us gul baġhair jaise abr-e-bahār āshiq

nālāñ judā rahegā rotā judā rahegā

dānista hai taġhāful ġham kahnā us se hāsil

tum dard-e-dil kahoge vo sar jhukā rahegā

ab jhamkī us kī tum ne dekhī kabhū jo yaaro

barsoñ talak usī meñ phir dil sadā rahegā

kis kis ko 'mīr' un ne kah kar diyā hai bosa

vo ek hai mufattin yūñhī chumā rahegā

hum ishq mein na jaana gham hi sada rahega

das din jo hai ye mohlat so yan daha rahega

burqa uThe pe us ke hoga jahan raushan

KHurshid ka nikalna kyunkar chhupa rahega

ek wahm si rahi hai apni numud tan mein

aate ho ab to aao phir hum mein kya rahega

mazkur-e-yar hum se mat ham-nashin kiya kar

dil jo baja nahin hai phir us mein ja rahega

us gul baghair jaise abr-e-bahaar aashiq

nalan juda rahega rota juda rahega

danista hai taghaful gham kahna us se hasil

tum dard-e-dil kahoge wo sar jhuka rahega

ab jhamki us ki tum ne dekhi kabhu jo yaro

barson talak usi mein phir dil sada rahega

kis kis ko 'mir' un ne kah kar diya hai bosa

wo ek hai mufattin yunhi chuma rahega