hum mast ho bhi dekha aaKHir maza nahin hai

ham mast ho bhī dekhā āḳhir maza nahīñ hai

hushyārī ke barābar koī nasha nahīñ hai

shauq-e-visāl hī meñ jī khap gayā hamārā

bā-āñki ek dam vo ham se judā nahīñ hai

har sub.h uTh ke tujh se māñgūñ huuñ maiñ tujhī ko

tere sivā.e merā kuchh mudda'ā nahīñ hai

zer-e-falak rukā hai ab jī bahut hamārā

is be-fazā qafas meñ mutlaq havā nahīñ hai

āñkheñ hamārī dekhīñ logoñ ne ashk-afshāñ

ab chaah kā kisū kī parda rahā nahīñ hai

muñh jin ne merā dekhā ek aah dil se khīñchī

is dard-e-'āshiqī kī aayā davā nahīñ hai

thiiñ pesh-az āshnā.ī kyā āshnā nigāheñ

ab āshnā hue par aañkh āshnā nahīñ hai

kariye jo ibtidā to tā-hashr haal kahiye

'āshiq kī guftugū ko kuchh intihā nahīñ hai

parda hī ham ne dekhā chehre pe gāh-o-be-gah

itnā bhī muñh chhupānā kuchh ḳhushnumā nahīñ hai

maiñ ro.uuñ tum hañso ho kyā jaano 'mīr' sāhab

dil aap kā kisū se shāyad lagā nahīñ hai

hum mast ho bhi dekha aaKHir maza nahin hai

hushyari ke barabar koi nasha nahin hai

shauq-e-visal hi mein ji khap gaya hamara

ba-anki ek dam wo hum se juda nahin hai

har subh uTh ke tujh se mangun hun main tujhi ko

tere siwae mera kuchh mudda'a nahin hai

zer-e-falak ruka hai ab ji bahut hamara

is be-faza qafas mein mutlaq hawa nahin hai

aankhen hamari dekhin logon ne ashk-afshan

ab chah ka kisu ki parda raha nahin hai

munh jin ne mera dekha ek aah dil se khinchi

is dard-e-'ashiqi ki aaya dawa nahin hai

thin pesh-az aashnai kya aashna nigahen

ab aashna hue par aankh aashna nahin hai

kariye jo ibtida to ta-hashr haal kahiye

'ashiq ki guftugu ko kuchh intiha nahin hai

parda hi hum ne dekha chehre pe gah-o-be-gah

itna bhi munh chhupana kuchh KHushnuma nahin hai

main roun tum hanso ho kya jaano 'mir' sahab

dil aap ka kisu se shayad laga nahin hai