hum na kahte the rahega hum mein kya yan se gae

ham na kahte the rahegā ham meñ kyā yaañ se ga.e

so hī baat aa.ī uThe us paas se jaañ se ga.e

kyā ba-ḳhud rahnā hamārā kuchh rakhe hai e.atibār

aap meñ aa.e kabhū ab ham to mehmāñ se ga.e

jab talak rahnā banā dil-tang ġhunche se rahe

dekhiye kyā gul khilegā ab gulistāñ se ga.e

kyā ġhazāloñ hī ko ham bin vahshat-e-bisyār hai

koh bhī nālāñ rahe jab ham bayābāñ se ga.e

laa.ī aafat ḳhānqāh-o-masjid uupar vo nigāh

sūfiyāñ diiñ se ga.e sab shaiḳh īmāñ se ga.e

duur kar ḳhat ko kiyā chehra kitābī un ne saaf

ab qayāmat hai ki saare harf qur.āñ se ga.e

jī to us kī zulf meñ dil kākul-e-pechāñ meñ 'mīr'

jā bhī nikle us kane to ham pareshāñ se ga.e

hum na kahte the rahega hum mein kya yan se gae

so hi baat aai uThe us pas se jaan se gae

kya ba-KHud rahna hamara kuchh rakhe hai eatibar

aap mein aae kabhu ab hum to mehman se gae

jab talak rahna bana dil-tang ghunche se rahe

dekhiye kya gul khilega ab gulistan se gae

kya ghazalon hi ko hum bin wahshat-e-bisyar hai

koh bhi nalan rahe jab hum bayaban se gae

lai aafat KHanqah-o-masjid upar wo nigah

sufiyan din se gae sab shaiKH iman se gae

dur kar KHat ko kiya chehra kitabi un ne saf

ab qayamat hai ki sare harf quran se gae

ji to us ki zulf mein dil kakul-e-pechan mein 'mir'

ja bhi nikle us kane to hum pareshan se gae