ہم نہ کہتے تھے رہے گا ہم میں کیا یاں سے گئے

ہم نہ کہتے تھے رہے گا ہم میں کیا یاں سے گئے

سو ہی بات آئی اٹھے اس پاس سے جاں سے گئے

کیا بہ خود رہنا ہمارا کچھ رکھے ہے اعتبار

آپ میں آئے کبھو اب ہم تو مہماں سے گئے

جب تلک رہنا بنا دل تنگ غنچے سے رہے

دیکھیے کیا گل کھلے گا اب گلستاں سے گئے

کیا غزالوں ہی کو ہم بن وحشت بسیار ہے

کوہ بھی نالاں رہے جب ہم بیاباں سے گئے

لائی آفت خانقاہ و مسجد اوپر وہ نگاہ

صوفیاں دیں سے گئے سب شیخ ایماں سے گئے

دور کر خط کو کیا چہرہ کتابی ان نے صاف

اب قیامت ہے کہ سارے حرف قرآں سے گئے

جی تو اس کی زلف میں دل کاکل پیچاں میں میرؔ

جا بھی نکلے اس کنے تو ہم پریشاں سے گئے