humse kyon uljha kare hai aa samajh ai na-samajh

ham se kyoñ uljhā kare hai aa samajh ai nā-samajh

kaj-tabī.at jo muḳhālif haiñ unhoñ se jā samajh

yaar kī un bholī bātoñ par na jā ai ham-nashīñ

ek fitna hai vo us ko aah mat laḌkā samajh

ḳhūb-rū ushshāq se bad pesh aate hī sune

garche ḳhush-zāhir haiñ ye par in ko mat achchhā samajh

bāġhbāñ be-rahm gul be-dīd mausam bevafā

āshiyāñ is baaġh meñ bulbul ne bāñdhā kyā samajh

maiñ jo narmī kī to duunā sar chaḌhā vo bad-ma.āsh

khāne hī ko dauḌtā hai ab mujhe halva samajh

duur se dekhī jo bad-halī vahīñ se Tal gayā

do qadam aage na aaya mujh ko vo martā samajh

'mīr' kī ayyāriyāñ ma.alūm laḌkoñ ko nahīñ

karte haiñ kyā kyā adā.eñ is ko saada sā samajh

hum se kyon uljha kare hai aa samajh ai na-samajh

kaj-tabiat jo muKHalif hain unhon se ja samajh

yar ki un bholi baaton par na ja ai ham-nashin

ek fitna hai wo us ko aah mat laDka samajh

KHub-ru ushshaq se bad pesh aate hi sune

garche KHush-zahir hain ye par in ko mat achchha samajh

baghban be-rahm gul be-did mausam bewafa

aashiyan is bagh mein bulbul ne bandha kya samajh

main jo narmi ki to duna sar chaDha wo bad-maash

khane hi ko dauDta hai ab mujhe halwa samajh

dur se dekhi jo bad-hali wahin se Tal gaya

do qadam aage na aaya mujh ko wo marta samajh

'mir' ki ayyariyan malum laDkon ko nahin

karte hain kya kya adaen is ko sada sa samajh